MORNING NEWS BRIEF [OCTOBER 25, 2022]

ព័ត៌មានសំខាន់ៗ

1. រដ្ឋសភា បានបញ្ជាក់ពីការត្រៀមខ្លួនរួចរាល់ ដើម្បីធ្វើជាម្ចាស់ផ្ទះកិច្ចប្រជុំមហាសន្និបាតអន្តរសភាអាស៊ាន លើកទី៤៣ ដែលនឹងប្រព្រឹត្តទៅនៅថ្ងៃទី២០ ដល់ ទី២៥ ខែវិច្ឆិកា ឆ្នាំ២០២២។ ប្រភព៖ ស្ថានីយទូរទស្សន៍ បី ធី វី 
2. កម្ពុជា និងអេមីរ៉ាត់អារ៉ាប់រួម បានចុះហត្ថលេខាលើសេចក្តីប្រកាសនៃការចាប់ផ្តើមចរចាជាផ្លូវការ ស្តីពី កិច្ចព្រមព្រៀងភាពជាដៃគូសេដ្ឋ-កិច្ចគ្រប់ជ្រុងជ្រោយ ដើម្បីជំរុញសេដ្ឋកិច្ច និងពាណិជ្ជកម្មទ្វេភាគី។ ប្រភព៖ ភ្នំពេញប៉ុស្តិ៍
3. សម្តេចប្រធានព្រឹទ្ធសភាកម្ពុជា និងប្រធានរដ្ឋសភាវៀតណាម បានវាយតម្លៃខ្ពស់ចំពោះទំនាក់ទំនងទ្វេភាគី និងបានអបអរកម្ពុជាចំពោះភាពជាប្រធានអាស៊ាន និងជាប្រធានអាយប៉ា។ប្រភព៖ ខ្មែរថាមស៍

ព័ត៌មាននយោបាយ

1. រដ្ឋសភា បានចេញសេចក្តីថ្លែងការណ៍ ស្តីពី ការថ្កោលទោសចំពោះការប្រមាថយ៉ាងធ្ងន់ធ្ងរ របស់ លោក សម រង្ស៊ី មកលើព្រះមហាក្សត្រ និងប្តេជ្ញាបន្តការពាររដ្ឋធម្មនុញ្ញ។ ប្រភព៖ ទីភ្នាក់ងារសារព័ត៌មានកម្ពុជា
2. កម្ពុជាក្នុងនាមប្រធានអាស៊ាន ប្តេជ្ញាជំរុញឱ្យមាន កិច្ចសន្ទនាដោយស្ថាបនា ក្នុងកិច្ចប្រជុំកំពូលអាស៊ានលើកទី៤០&៤១ ដើម្បីចៀស-វាងការប្រឈមមុខដាក់គ្នាជាអរិភាព និងការគណនាខុស។ ប្រភព៖ ខ្មែរថាមស៍
3. កម្ពុជា នឹងបញ្ជូនកងទ័ពមួកខៀវចំនួន ៣៤៦នាក់ ទៅកាន់សាធារណរដ្ឋម៉ាលី​ និងសាធារណរដ្ឋស៊ូដង់ខាងត្បូង ដើម្បីបំពេញបេសកកម្មរក្សាសន្តិភាពក្រោមឆត្រអ.ស.ប។ ​ប្រភព៖ Fresh News

ព័ត៌មានសេដ្ឋកិច្ច 

1. កម្ពុជា​ និងភាគីកូរ៉េខាងត្បូង គ្រោងនឹងបង្កើតមជ្ឈមណ្ឌលស្បៀងអាហារ (FTC) ដើម្បីជំរុញផលិតកម្មចំណីអាហារក្នុងស្រុក និងកាត់បន្ថយការនាំចូល បន្ទាប់ពីការផ្តល់សច្ចាប័នលើ CKFTA។ ប្រភព៖ ភ្នំពេញប៉ុស្តិ៍
2. ក្នុងរយៈពេល០៩ខែនៃឆ្នាំ២០២២ កម្ពុជា បាននាំចេញទំនិញទៅកាន់ប្រទេសថៃក្នុងទំហំទឹកប្រាក់ចំនួន ៦៥៥លានដុល្លារ កើនឡើង ៣៨% បើធៀបនឹងរយៈពេលដូចគ្នាក្នុងឆ្នាំ២០២១។ ប្រភព៖ ភ្នំពេញប៉ុស្តិ៍
3. រាជរដ្ឋាភិបាល បាននិងកំពុងលើកកម្ពស់ និងគាំទ្រ SMEs និងធុរ-កិច្ចថ្មីដែលជាវិស័យអាទិភាពក្នុងការធ្វើពិពិធកម្ម និងរក្សាកំណើនសេដ្ឋកិច្ច ដែលវិស័យនេះបានរួមចំណែកជាង ៥៨% នៃផ.ផ.ស។ប្រភព៖ AMS News

ព៍ត៌មានសង្គម

1. សម្តេចតេជោនាយករដ្ឋមន្ត្រី បានបញ្ជាឱ្យក្រសួងកសិកម្មសិក្សាលទ្ធភាពក្នុងការបង្កើតតំបន់ផលិតពូជស្រូវ ដើម្បីចែកជូន និងជួយសម្រួលប្រជាពលរដ្ឋដែលខ្វះខាត នៅតាមបណ្តាខេត្ត។ ប្រភព៖ ទីភ្នាក់ងារសារព័ត៌មានកម្ពុជា
2. អូស្ត្រាលី បានប្តេជ្ញាគាំទ្រដល់ការផ្លាស់ប្តូរទៅរកថាមពលស្អាត និងឆ្ពោះទៅរកការអភិវឌ្ឍបន្ថែម ដែលមានលក្ខណៈអំណោយផលដល់បរិស្ថាន និងប្រកបដោយបរិយាប័ន្ននៅកម្ពុជា។ ប្រភព៖ ខ្មែរថាមស៍
3. ក្រសួងសាធារណការ បានសិក្សាពីគម្រោងសាងសង់ផ្លូវវាងក្រុងសៀមរាបចំនួន ២ខ្សែបន្ថែម ដើម្បីអភិវឌ្ឍតំបន់អភិវឌ្ឍន៍រុនតាឯក និងពាក់ស្នែង ក្នុងទំហំទឹកប្រាក់ប្រមាណ ១៤០លានដុល្លារ។ ប្រភព៖ ភ្នំពេញប៉ុស្តិ៍